from Trafford Council
Traffprd 區議會資訊
Declaration: Information on this page is for reference only. Please refer the actual information and arrangement(s) to the corresponding official information and announcement instead.
聲明：本頁資訊謹供參考，一切應以有關官方機構公佈及決定為準。
2021年11月23日 Trafford Council 歡迎香港人新居民
Trafford Council 嘅 Inclusive Economy and Communities Team 先前喺 2021 年 11 月 16 日，喺 UA92 度為香港嚟嘅新朋友舉辦咗一個就業及培訓支援活動，有成二百幾位香港人參加。
Trafford Council 嘅新聞公布譯文如下：
由香港到……脫福！最近，上百個家庭由知名嘅遠東地區嚟到脫福定居，並得到 Trafford Council 歡迎。
Trafford Council 嘅 Inclusive Economy and Communities Team 籌辦咗一個極為成功嘅活動，提供資訊、建議以及支援畀我哋嚟自世界另一邊嘅新居民。
據估計，大約有成 800 人最近由香港嚟到脫福定居。Trafford Council 一直都同 Trafford Hongkongers CIC（一間 community interest company）緊密合作，以檢視新居民需要以及確認有咩建議以及支持可以提供畀新居民，令佢哋可以感到係屬於社區嘅一部份。
今次呢個喺 UA92 度舉辦嘅就業及培訓支援活動，絕對係一次大成功，有成 200 位香港人新移民出席。參與嘅團體以及 Trafford Council 提供咗唔同嘅建議及資訊，包括國家職業服務（National Careers Service）、DA Language、Trafford College、UA92 以及 Growth Company。
而活動裡面各個組織所提供嘅資訊集中係技能轉移、寫 CV、面試及求職支援。創業人士亦可以喺 Growth Company 以及 Momentic 度得到資訊。
代表 Trafford Council 主持開幕儀式嘅區議員 Cllr Mike Freeman（同時亦係區議會專責就業及技能嘅執行委員）話：
「好高興咁多位香港人新朋友選擇定居喺 Trafford 呢度作為佢哋新嘅屋企。Trafford Council 會竭盡所能，去幫大家喺度安居樂業、搵工，同埋成為今日 Trafford 呢個，咁多元嘅社區嘅一部份，一齊喺度各展所長。Trafford Council 知道，作為一個區議會，多元文化對於過去同將來建設 Trafford 呢個地方，係好重要架。Trafford Council 會繼續歡迎每一位，選擇定居喺呢度嘅朋友。」
Sarah Ryan，一位自由身商業顧問，話:
「好多埋嚟傾偈嘅朋友都好令人鼓舞,而我都忙到冇停手。有啲朋友想開展食物批發或者零售生意去照顧香港人社群嘅需要，有啲想開搞裝修生意，有啲就想搞私募投資公司。
佢哋都得到指引去知道 Trafford 唔同嘅支援同資源，而大家以及翻譯員畀返我地嘅回饋同讚賞亦我感到自己嘅渺小。」
Trafford Hongkongers CIC 發言人話：
「Trafford Hongkongers CIC 好感激 Trafford Council 一直以嚟喺唔同範疇裡面對香港人新移民嘅支援，包括小朋友教育、ESOL 英文班、就業支援以及創業建議等。
今日嘅就業及培訓支援活動絕對係一個里程碑。我哋相信,喺 Trafford Council 支援下，香港人新移民可以順利融入 Trafford 社區，並會貢獻喺建設一個共融及團結嘅 Trafford 社區。」
Trafford Council 會繼續同 Trafford Hongkongers CIC 合作，去推廣本地就業機會，並會準備僱主指南，等佢哋可以更了解呢批居民嘅就業權利，並會提供更多 ESOL 英文班去增強佢哋英語能力，以便佢哋投身就業市場。
2021年10月13日 區議會大會
會議情況 (YouTube)：https://www.youtube.com/watch?v=b1UWINHHSpI&t=2940s
Trafford Council Meeting 入面，自由民主黨 (Liberal Democrats) 動議通過「Hongkongers in Trafford」議程。Trafford Council 四個黨派，包括工黨 (Labour)、保守黨 (Conservatives)、自由民主黨 (Liberal Democrats) 以及綠黨 (Green Party)，都一致認同及支持呢個動議。各黨派區議員嘅發言內容，Trafford Hongkongers CIC 已經翻譯成香港語，畀大家參考。如果大家想聽返英文原話，可以上 YouTube 睇返有關動議大約半小時嘅討論。
Trafford Council 決議案
動議中嘅決議案包括：
監察香港人小朋友入讀 Trafford 學校嘅情況，及增撥額外資源畀「英文作為第二語言 (English as a Second Language)」及「個人、社交、健康及經濟教育」以協助佢哋融入英國社會；
協助 SEND 小朋友嘅家長，喺 Trafford Council 嘅網站上面，提供粵語版本嘅「SEN Local Offer」及「教育、健康及照顧計劃 (EHC Plan)」嘅資訊；
寫信向 MHCLG（現已改稱為 DLUHC）表示 Trafford Council 有興趣貢獻並成為英國新成立嘅「Hong Kong Welcome Hubs」之一；
確保本動議嘅決議案會定時喺 Trafford Council 匯報進度，並且會被納入 Trafford Council 執行委員會關於社區以及合作伙伴嘅簡報之中。
另外，由於動議係喺英軍撤出阿富汗之前已經提交，為咗令到動議更加包容 (inclusive)，其中一個修訂就係話「Trafford Council 歡迎所有新嚟 Trafford 嘅朋友」，旨在除咗集中焦點喺新嚟嘅香港人之外，亦想照顧包括埋阿富汗人嘅所有族群。
Councillor Julian Newgrosh (Liberal Democrats, Village 選區) 發言
Liberal Democrats 領袖兼區議員 Councillor Julian Newgrosh 表示，決定將成頭家由一個你熟悉嘅地方搬到去另一個國家重新開始絕對係一個艱難決定，即使冇因為民主、自由、人權以及自身文化受到攻擊侵蝕作為背景嘅情況下，都會係一樣。佢相信所有區議會同事及議員都會因為咁多香港人選擇喺 Trafford 呢度展開全家人生嘅新一頁而感到驕傲，而 Trafford 絕對係一個歡迎大家嘅地方。
佢面見過 Trafford Hongkongers CIC 兩位代表後，佢感受到香港人嘅樂觀以及希望。但同其他英國新移民一樣，香港人都會喺度面對唔同挑戰。
佢認為，Trafford Council 可以亦理應做多啲嘢去幫助香港人。我哋會為 Trafford 一流嘅學校而感到驕傲，而急劇增加嘅學位需求就係佢中一個憂慮，呢件事需要 Trafford Council 同學校以及家長一齊去搵學位，而呢件事係唔應該變成政黨間嘅政治問題。
佢認為大家都需要變得更包容，呢個動議可以令 Trafford Council 可以盡量使用粵語，去畀香港人可以從 Trafford Council 中得到最重要 (vital) 嘅資訊，特別係教育呢方面。
融入英國對於喺英國嘅香港人嚟講係極為重要，而香港人當中亦好多人因為價值觀類同而感到自身同英國關係密切，區議員同事可以喺日常生活中就可以幫助到香港人。
有居民曾經同佢講，作為新移民佢哋會經常感到被孤立或受限於一個地方，難以走入社區，通常係因為日常生活繁瑣事，諸如照顧小朋友、搵工或者新工作所帶嚟嘅壓力。當一個人去到一個新嘅國家，講一個新嘅語言，冇喺冇家人支援，冇本地知識嘅情況下，佢認為當晚在座嘅區議員既然本身有咁多本地嘅聯繫，就有責任去幫助香港人同本地組織間可以互相聯繫。透過支持呢個動議，可以為呢家已經喺 Trafford 以及將來到Trafford 嘅香港人發放一個正面而又包容嘅訊息：Trafford Council 會積極咁同香港人喺社區中共事，即使喺個人層面都好，香港人可以仰賴 Trafford Council ：可以得到歡迎、訴求得到聆聽、並使到 Trafford Council 可以代表大家努力做事。佢希望政治光譜上嘅所有黨派都可以團結一致咁支持呢個動議。
Councillor Jane Brophy (Liberal Democrats, Timperley 選區) 和議
Councillor Andrew Western (Labour, Priory 選區) 提出修訂及發言
Trafford Council 兼 Trafford Labour 領袖兼區議員 Councillor Andrew Western 多謝 Liberal Democrat 向 Trafford Council 帶出呢一個咁重要嘅動議。佢話 Councillor Julian Newgrosh 都暗示咗各黨派都有會面 Trafford Hongkongers CIC 代表；而佢本人並唔係以工黨領袖身分，而係 Trafford Council Leader 身分，聯同 Trafford Council 署任首席執行官，喺幾個星期之前（按：指2021年9月7日）去會面 Trafford Hongkongers CIC 代表，討論咗好多香港人嚟到 Trafford Council 所面對嘅議題。
第一件佢想講以及帶出議會嘅，就係歡迎每一位以及所有定居於 Trafford 嘅香港人，佢哋好高興香港人選擇 Trafford，希望香港人喺嚟緊嘅日子，以月或以年計嘅將來，可以完全融入社區。
佢同意 Councillor Julian Newgrosh 嘅修訂，以反映世界局勢變化。
Trafford Council 一直都認知到有需要調度有限嘅資源以應付唔同嘅需要，例如為香港人社群做咗好多工作，包括新成立嘅 Trafford Hongkongers CIC 所關注嘅英文 assessment，現時已經有過百位香港人申請，以及為香港人（按：其實任何人都可以參加）傾談小組 (conversation cafe) 畀大家可以好好練習英文、分享周圍所見到嘅資訊、喺呢個國家返工、獲得老人服務支援等等。有好多議題都值得 Trafford Council 下定決心去推進呢啲議題，等香港人感受到呢度歡迎佢哋。
有啲修訂案中加咗啲項目，係因為佢同 Trafford Council 署任首席執行官會面 Trafford Hongkongers CIC 之後而加嘅。第一件事我要代大家講，Trafford Council 絕對譴責任何以及所有仇恨犯罪 (hate crime)。當佢聽到 Trafford Hongkongers CIC 其中一位代表曾經遇到仇恨犯罪嘅時候，佢係好唔開心。雖然值得慶幸嘅係仇恨犯罪嘅數量唔係好多，但 Trafford Council 一定要經常警惕，以及向仇恨犯罪說不，佢知道絕大多數嘅居民都係一樣。
另一件事，對持續擴大嘅香港人社區有好大影響嘅，就係當佢地抵達英國之後要申請國民保險號碼 (National Insurance Number)。兩個原因：第一個好明顯係因為香港人想搵工；第二個係因為香港人嚟到英國係唔可以使用 public funds（按：並唔係所有政府資源會被歸類為 public funds，public fund 定義詳情請撳呢度）。呢件事猶關重要，大家可以做到幾多得幾多。佢明白要 DWP （按：處理 NI number 申請嘅英國政府部門）加派人手去處理呢件事係對 DWP 嚟講會係一場壓力。但因為呢件事真係（對香港人嚟講）好重要，佢希望各黨派嘅區議員都可以聽到香港人呢方面嘅需要，透過佢哋政黨嘅國會議員，將問題帶到去國家層面，從而為香港人新移民社群解決呢個問題，令佢哋可以盡快投入職場，以及在座咁多位區議員想 Trafford 居民可以享受到嘅嘢，香港人都可以享受到。
Councillor Nathan Evans (Conservatives, Timperley 選區) 發言
Trafford Conservatives 領袖兼區議員 Councillor Nathan Evans 表示，保守黨明確歡迎所有新移民，以及歡迎呢個動議同埋修訂。保守黨都有接觸香港人社群。
……
保守黨當然接納新移民，有幾位保守黨區議員及代表都有去會面香港社群嘅代表。保守黨亦有代表佢哋去聯絡 ATC、男童軍、女童軍甚至 Police Cadet Force（按：即係英國版少年警訊），睇下會唔會可以有幫到香港人嘅地方。
保守黨亦有介紹 Altrincham & Sale West 嘅保守黨國會議員 Sir Graham Brady MP，佢亦有會面 Trafford Hongkongers CIC 代表，並將香港人嘅憂慮提上國會，甚至帶代表參觀 Trafford Town Hall。
Sir Graham Brady MP 已經將修訂案上面提到嘅 NI number 問題，寫信畀 DWP 反映。四個星期前 Guy Oppermann（按：負責 DWP 嘅一位保守黨國會議員）已有回覆，指現時申請 NI number 嘅個案好多，平均需時 13 個星期，呢度係指所有人嘅申請，當中包括咗香港人新移民嘅申請。DWP 呢家已經招聘同培訓緊更多人手，去縮短申請 NI number 嘅時間。並加快處理有需要社會保障嘅人嘅申請。有關答案已於 2021年9月20號 喺國會網頁發佈。保守黨亦有因為車牌申請嚴重延誤而聯絡 DVLA（按：處理車牌申請嘅英國政府部門）。由於學位緊張，保守黨亦有向 Trafford Hongkongers CIC 代表介紹更多嘅教育機構（按：指私立學校）。
保守黨敦促 Trafford Council 要包容咁去處理呢個問題。點都好，保守黨完全支持呢個動議同修訂，以及歡迎新移民。
Councillor Andrew Western 回應 Councillor Nathan Evans
（由於回應內容與動議冇直接關係，Trafford Hongkongers CIC 在此不敘。）
Councillor Daniel Jerrome (Green Party, Altrincham 選區) 發言
Trafford 綠黨領袖兼區議員 Councillor Daniel Jerrome 表示，綠黨都會伸出溫暖嘅手去幫已經到咗以及嚟緊呢度定居嘅香港人。香港人一定會擴展英國社會、豐富英國文化以及相當可能經濟上有所貢獻。希望將來喺會議室裡面都會見到香港人出現。
我相信 Councillor Coggins（另一位綠黨區議員）已經會面咗 Trafford Hongkongers CIC 代表（按：將會於2021年10月30號見面）。綠黨歡迎，亦全心全意咁支持呢個動議同修訂。
Councillor Meena Minis (Liberal Democrats, Timperley 選區) 發言
Liberal Democrats 區議員 Councillor Meena Minis 表示，大家都咁歡迎嚟到英國定居嘅人，令佢好感動。佢父親係嚟自烏干達嘅印度人（按：當年烏干達係前英國殖民地中獨立，當時軍人政府領袖「狂人阿敏」驅逐所有烏干達印度人，當時英國接受咗好多呢類烏干達印度人，包括現時英國內政大臣 Priti Patel 嘅父親），當佢爸爸嚟到英國之後，都有支持其他嚟英國定居嘅人。
Councillor Jane Brophy (Liberal Democrats, Timperley 選區) 發言
Liberal Democrats 區議員 Councillor Jane Brophy 多謝每位區議員，並讚揚歡迎嚟到 Trafford 嘅香港人嘅工作。佢好高興 Trafford Council 將呢個歡迎擴展到香港人及所有新移民，呢個係一件好事嚟。佢亦好高興咁多香港人選擇定居喺 Trafford 呢度，令呢度更加多元同融和。佢好開心聽到先前每位嘅發言，因為每位嚟到英國嘅人都會為英國文化增值。
因應提出動議後嘅時局轉變，Liberal Democrats 多謝 Councillor Andrew Western 提出修訂，亦為 Councillor Andrew Western 已經會面過同歡迎香港人，一齊反對仇恨犯罪。亦好高興 NI number 嘅問題可以帶到去國會層面。佢亦支持綠黨 Councillor Daniel Jerrome 話香港人可以為擴展同豐富英國社會。希望之後會有香港人出現喺 Trafford Council 嘅會議裡面。多謝嚟自綠黨嘅支持，多謝 Councillor Meena Minis 嘅個人分享。最後，歡迎香港人為我哋嘅將來帶嚟希望。
Councillor Mike Freeman (Labour, Sale Moor 選區) 發言
工黨區議員 Councillor Mike Freeman 表示想講同 Trafford Council 領袖所講嘅完全一樣嘅說話，以及多謝 Liberal Democrats 帶出原本嘅動議，以及多謝綠黨嘅發言，亦想向 Trafford Council 指出，今年初已經有一個好開始，就係區議會請咗一個 skill coordinator 以及 ESOL coordinator（按：指 Steph Carter），ESOL coordinator 做得好好，唔單止係為香港人社群，仲包括為所有尋求再培訓同搵工嘅社群。所以佢想在此多謝在座咁多位去支持呢個動議同修訂。